1 აპრილს საქართველოს პარლამენტის ეროვნული ბიბლიოთეკის საგამოფენო დარბაზში გაიმართება ზაალ სულაკაურის სამხატვრო სტუდიის მოსწავლეთა და პედაგოგთა გამოფენა. ნამუშევრებს წარმოადგენენ ხატვის, ძერწვისა და გამოყენებითი ხელოვნების ჯგუფების მოსწავლეები. ზაალ სულაკაური კი აუდიტორიის წინაშე საზოგადოებისთვის აქამდე უცნობი ნახატებით წარდგება.
ზაალ სულაკაურის სამხატვრო სტუდიის მოსწავლეთა და პედაგოგთა საგაზაფხულო გამოფენის 1 აპრილს მოწყობა უკვე ტრადიციად იქცა. წელს გამოფენა მეექვსედ იმართება და დამთვალიერებელს კიდევ ერთხელ ეძლევა საშუალება შეაფასოს როგორც ბავშვების, ისე მათი პედაგოგების ახალი ნამუშევრები.
გამოფენაში მონაწილე პედაგოგები და მათი მოსწავლეები ზაალ სულაკაურის სამხატვრო სტუდიისა და საქართველოს პარლამენტის ეროვნული ბიბლიოთეკისგან გამოფენაში მონაწილეობის დამადასტურებელი სიგელებით დაჯილდოვდებიან.